سفيرية الدجاج 🐔 وصفة سهلة و خفيفة و نتيجة بزاف بنينة

نقدم لكم وصفة سفيرية الدجاج، وصفة قديمة وتقليدية بنينة بزاف وتفكرنا بأيام زمان. نقدر نديرها للفطور أو كي يجوني الضياف، وتجي خفيفة وتشهي. أنا درتها غير بربع صدر دجاج وشوفوا شحال خرجت لي من خبيزات. يلا تبعيني للآخر تشوفي الطريقة كاملة.

المقادير

ربع صدر دجاج
3 أطراف دجاج

حبة بصل

زيت

ملح

فلفل أسود

توابل دجاج

حمّيصة (حمص طايب)

3 م .ك شابلور 

معدنوس

2 إلى 3 حبات بيض

جبن طري

طريقة التحضير

- في طنيجرة نحط الزيت يسخن ونضيف الدجاج وحبة البصل المقطعة رقيق ونخليهم يتقلاو مليح.

- نضيف الفلفل الأسود وتوابل الدجاج و القليل من الملح و نخليهم يتقلاو مليح  .

- نضيف اشوية حمّيصة و نمرق بالماء الساخن ونغلق عليه حتى يطيب وينشف المرق شوية.

- ننحي ربع صدر الدجاج ونفتتو مليح في اناء  (نفضل نقصو بالمقص باش يجي رقيق).

- نضيف اليه 3 الى 4 ملاعق كبيرة شابلور ومعدنوس مقطع رقيق , و نضيف رشة ملح وفلفل أسود.

- نضيف 2 حبات بيض (أو 3) و نخلط جيدا حتى نتحصل على خليط متماسك ومطلوق شوية (ما يكونش ناشف).

- ناخذ شوية من الخليط ونحط في الوسط جبن طري (تاع البيدون) , و نغلق عليه مليح ونشكل خبيزات , ثم نخليهم يرتاحوا شوية باش يشدوا روحهم.

- نسخن الزيت ونقليهم مباشرة بدون تغميس في أي حاجة , و نخليهم يتحمروا من الجهتين حتى يجي لونهم ذهبي جميل.

- نرجعهم للمرق اللي طاب فيه الدجاج ونخليهم حوالي 5 دقائق باش يتشربوا مليح.

- في اناء التقديم نقدمهم سخونين مع المرق وقطع الدجاج المحمر في الوسط , اتجي سفيرية الدجاج طرية من الداخل، الفرماج دايب، والمرق يشهي بزاف.

شهية طيبة ❤️